“Mi no ta bay perde mucho tempo cu e caso ey, pasobra Huez a determina cu e ta bay dicta sentencia dia 5 di November. Nos ta bay warda riba e fecha ey prome cu bay den detaye riba loke a ser presenta den Corte. Mientras tanto, mi kier pa Kenneth, Evelyn y Hendrik sa cu di mi parti no tin ningun rencor contra nan, pasobra mi no ta kere den e conservacion di odio, rechazo o rencor como parti di mi caracter o modo di procede. Loke mi no ta compronde ta pakico nan no a admiti e existencia di e cuenta bancario ey for di un principio y asina evita tur e badabada cu a sigui despues. Ami lo a hacie sigur.
“E guera cu Hendrik a caba hopi aña pasa, y mi no ta mira ningun motibo pa rebiba cosnan cu a keda dera den e stof di 20 aña desde cu nan a sosode. E no ta sirbi ningun proposito. Pero, mi kier probecha e ocasion si pa splica algo cu parce hopi hende no ta compronde, especialmente hopi politico. DIARIO ta di mi, berdad, pero no ta ami ta skirbi e articulonan cu ta aparece den dje, cu excepcion di e editorialnan. Tin un staf completo di redactor, reportero y fotografo cu tin e tarea di haci esey riba nan mes, sin mi supervision. Como cu mi ta tumando un tratamento medico basta largo, no ta kedami tempo pa acudi na DIARIO tur dia pa revisa o sikiera lesa e articulonan cu ta bay sali e dia siguiente. Asina cu mi caba e tratamento, Dios mediante lo mi ta presente atrobe den DIARIO cu hopi mas frecuencia.
“Contestando otro vupa di e abogado di Kenneth, please mester tene na cuenta cu DIARIO tin mas di 34 aña ta sali tur dia, o sea mas cu 10,000 corant publica te awor. Di cu por a sali 4 rectificacion den algun caso politico durante tur e tempo ey ta un record na fabor di DIARIO, no contra dje, pasobra pa mantene un corant asina limpi durante tanto aña tin su merito propio. Pesey Pueblo, den su mayoria, ta orguyoso di su matutino cu nunca a faye ora di defende loke ta di interes pe y pa Aruba. Y pesey tambe cu for di e prome dia cu el a sali te e dia di awe, e ta e number 1 riba Mercado!”
| FUENTE: http://www.diario.aw |
