Ta for di un tempo caba e muhe aki lo a wordo informa pa dokter cu e ta portado y cu e tin AIDS cu a bin afecta e persona aki grandemente.
Sinembargo mientras cu varios persona cerca di dje a wordo informa pa entre otro su persona mes di e situacion aki, nan a bin ripara cu e muhe a dicidi di sigui gosa di su bida sexual y entre otro el a bira hopi activo mes riba tereno sexual.
Esunnan mas cerca di dje a bin ripara cu constantemente e tin otro homber di bishita y cu e ta tene relacion sexual cu nan pero e gran preocupacion ta si e muhe lo ta informa e hendenan aki di su situacion, of si esakinan ta tuma precaucion y proteha nan mes pa no wordo infecta cu e virus aki durante di relacion sexual.
Informacion cu Diario a logra di acumula caba riba e caso aki ta cu DBZ lo ta na altura di e caso aki y cu nan ta buscando tur forma pa atende cu e caso den un forma cu e lo no afecta e muhe mas ainda pero si cu mester bay over na proteha esunnan cu ta haya nan mes envolvi den esaki.
Fuera di proteccion aki, tin caso di otronan cu ya caba a tene relacion sexual cu e muhe y cu nan tin cu bay haci e control necesario como medida di precaucion y proteccion pa nan mes y otronan den nan bida. Entre otro ta existi e situacion serio caminda e muhe lo a bay cama tambe cu algun homber cu ta casa y cu lo por hiba e malesa aki cas pa nan señora, mientras cu otronan por hiba esaki pa nan pareha of amiga. Ultimo tempo mucha homber nan basta hoben tambe ta involvi.
Informacionnan duna na Diario ta mustra cu autoridadnan policial, tambe ta na altura di e caso aki pero den cierto forma no por haci mucho cos, ya cu e muhe no ta haciendo algo contra ley pero si mester bay over na bati alarma y tur homber cu ta den e tipo di actonan aki di sex casual, mester ta bon na altura cu nan tin cu proteha nan mes dor di uza proteccion den forma di condon.
Algun persona cu tabatin contacto sexual cu e muhe aki ya caba a ser someti na testnan intensivo pero e peliger ta keda cu lo tin otronan cu no sa di kico ta pasando y por haya nan mes envolvi den situacionnan mucho mas serio cu nan mes por pensa di haya nan mes.
Tin un persona cu a test positivo, pues e tambe ta infecta cu e virus di AIDS, pero e homber aki tabata ex di e muhe loke ta mustra cu e posibilidad ta grandi cu tin otronan cu tambe a keda infecta cu e virus aki, door di no uza proteccion debido. E senora infecta ta hopi den casino y ta busca diferente homber cu ta bishita casino. Di pafo no ta mustra cu e ta un persona mahos y cu su bunitesa ta impacta y e homber nan ta cay pe. Ta spera cu cada homber tuma responsabilidad riba nan mes y ta mas consciente pa uza proteccion pa preveni un situacion cu no ta deseabel pa ningun hende.
| FUENTE: http://www.diario.aw |
