(Aruba) Mayornan ta desmenti envolvimento di futbolista den caso di “rape”

E conocido Lionel “Rupi Rupi” Croes, presentado di programanan na radio y television y alabes Vocero di Serlimar ta tata di e hoben Liomar Croes. Nomber di su yiu ta por lo menos un di esunnan menciona riba rednan social como un posibel sospechoso den e caso di probable abuso sexual di un agente di Polis.

Den un “post” riba Facebook, tanto Lionel Croes como su casa, ta desmenti cu nan yiu tin algo di haber cu e caso lamentabel aki. “Mi yiu no a ni sali for di cas ayera. Nan ta bruhando e inicial di mi yiu cu otro hende. Mi a bay Polis caba y a verifica cu mi yiu no tin nada di haber cu e caso”, asina Lionel Croes a confirma na nos. E ta spera cu e rumornan aki por stop mesora pa no perhudica y daña nomber di su yiu innecesariamente.

Liomar Croes ta un hungado di e ekipo di futbol Estrella di Santa Cruz. Parce cu e investigacion ta mustrando cu un primo di e Polis a sali cune cu dos hoben mas for di Chupito’s diasabra marduga. E dos hobennan ey ta conoci. Nan ta insisti cu no a haci e mucha muhe nada, esta cu despues di a sali for di e club, cu nan a bay un otro club nocturno mas pero e mucha muhe no kier a sigui trip cu nan y como tal nan a bay lage.

Diadomingo mainta e dos hobennan aki, di fam Damian y Croes a keda di bay Warda di JZP na Balashi pa testigua den e caso aki y pa duna nan testimonio. Ta bira mas obvio awor cu e primo cu a sali cu e agente di Polis tin un rol masha importante pa duna claridad cu kende nan a keda despues y kende(nan) lo a sigui cu e agente di Polis y abusa di dje sexualmente.

No por keda sin haci un apelacion dramatico riba comunidad pa uza e cautela necesario den fomenta rumor riba e caso aki. Duna husticia espacio pa por haci un investigacion neutral, teniendo na cuenta cu ta trata aki di un hende muhe, pero tambe un Polis.

Diasabra henter dia a saca yen di rumor cu no ta aporta na e investigacion, sino mas bien ta crea mas bruhacion, daña nomber di hende pornada y hasta por ta desviando atencion den e caso serio aki cu merece tur atencion di husticia. Lamentablemente, hasta miembronan di Cuerpo Policial, cu mester sa miho, tambe ta aporta na e tipo di rumornan falso asina dor di publica informacionnan robes riba nan pagina di Facebook of papia cosnan cu no tin base of cu nan lo no por substancia mañan den un investigacion penal. Aunke cu e caso a causa hopi rabia den e organisacion policial, toch mester maneha e informacionnan di tal forma pa no perhudica e investigacion innecesariamente.

FUENTE: http://www.diario.aw