Esaki miembro di fraccion di AVP, sr Jeffrey Kelly ta trece dilanti despues di a sinta y scucha discurso di dos miembro di e fraccion geel siman pasa.
Sin argumento: “Claramente tur hende por a tuma nota di e situacion aki durante di reunion riba presupuesto di ministerio di turismo ya cu den forma bon cla, Dangui Oduber a haci un esfuerso grandi pa mustra tur hende cu su persona y hasta a duna e impresion cu partido MEP, ta contra Venezolanonan cu ultimo lunanan ta bishitando Aruba pa haci compras, yamando e hendenan aki como ‘turistanan di supermercado.’
Durante ambos presentacion di Dangui Oduber siman pasa, e no a duna un solo aporte, na maneho di turismo pero solamente a haci un esfuerso grandi pa trata di desbarata e maneho di Minister di Turismo, sr Otmar Oduber, loke simplemente e no a logra den e intento aki.
Contra turistanan Venezolano: Cu gran asombro tur hende a sinta scucha Dangui ataca turistanan di Venezuela cu ta dunando un aporte grandi na economia di nos pais, y tur posibilidad cu e por a pensa ariba, el a uza pa mustra su menosprecio pa bishitantenan for di Venezuela.
Mas asomobroso ta e hecho cu den seno di famia di Dangui Oduber mes, tin descendiente di Venezolano pero hasta esaki e miembro di MEP no a tuma na consideracion den su atake sin sentido contra di Venezolanonan, cu ta bishitando Aruba na gran escala pa mas cu cinco luna caba.
Dos coriente den fraccion di Mep: Loke tur hende por a tuma nota tambe ta cu den mesun fraccion di MEP, nos a constata cu tin un coriente net lo contrario di loke Dangui ta pretende ya cu nos a ripara cu Glenbert Croes di su parti, si a mustra hopi comprension pa no bisa cu el a mustra aceptacion total pa e Venezolanonan cu ta bishitando nos isla pa algun tempo caba.
Glenbert a mustra mucho mas madurez y conocemento politico di e tipo di asuntonan aki, compara cu su colega Dangui cu simplemente kier a ataca maneho di Minister di Turismo, sin tuma na consideracion cu e mester respeta bishitantenan for di Venezuela cu ta aportando grandemente, sea na e sector turistico of economico.
Sinembargo e contrasta aki den seno di fraccion di MEP, ta notabel for di momento cu a inicia cu tratamento di presupuesto 2015, caminda henter e reunion ta worde uza pa e fraccion geel pa busca confrontacion politico y nada mas,” Parlamentario Jeffrey Kelly a trece dilanti.
| FUENTE: http://www.diario.aw |
