Loke a exalta den e caso ta, cu e situacion den KIA ta un desaster. Tabata tin 8 sospechoso y 7 testigo cu a worde tendi pa hues comisario y tur a testigua incluyendo e director mes di KIA, cu e situacion den KIA ta peligroso. E cuidadonan di preso cu ta traha den KIA ta teme pa nan bida. Tabata tin asina hopi incidente cu a pasa.
Lejuez a splica cu e aña ey, prome cu e incidente a tuma luga dia 13 di Juni 2014, durante e aña ey so, tabata tin entre otro cu e prisoneronan a kima den Huis van Bewaring. Dos prisonero peligroso a huy. Tabata tin kimamento den strafafdeling.
El a worde asina hopi kima cu e no por worde usa mas. Mester a cambia den KIA mes, mandando e hende hombernan pa un otro parti di KIA, sacando e hende muhenan for di eyden y hincanan otro parti di e instituto.
Un cos mas cu a resalta durante e caso cu un di e motibonan pakico e problema di KIA ta asina grandi cu tin falta di hende cu ta traha eynan. Tin falta di personal. E falta di personal aki no solamente pasobra cu no tin suficiente hende pa traha, pero tambe pasobra cu tin un ziekteverzuim hopi halto.
Tin hopi hende ta keda malo cas sin bin traha y door di esey esnan cu si ta traha, ta traha oranan largo. Ta hopi comun y varios testigo a bisa esey, ta traha 16 ora pa dia, tres dia tras di otro.
Dia cu e incidente a sosode na 2014, hopi di e detenidonan aki tabata bao di impresion cu e guardianan tabata bao di un presion hopi halto cu segun defensa a conduci na un explosion.
E ex director di KIA mes a usa e termino Kruidvaat (un timebomb), cu cualkier momento por explota. e aña ey ta loke a pasa, cu e tension tabata asina halto, e emosionnan tabata asina grandi, tanto biaha cu e presonan ta cherche, scupi, menaza, hasta tira urina y af riba e guardianan den KIA mes, cu dado momento ora cu un di nan a bay asina leu di kibra nanishi y laga un di nan tur na sanger, nan a perde control y a duna e homber aki un bati. Esey ta e motibo pakico nan a bin dilanti, Lejuez a splica.
| FUENTE: http://www.diario.aw |
