Tabata tin un caso den corte algun tempo pasa, caminda ocho cuidado di preso a worde persigui. Abogado Chris Lejuez a comenta cu aña pasa, un preso a dal un guardia di preso den su cara, kibra su nanishi p’e, lag’e tur na sanger.Nan a domina e preso aki y a hib’e pa bay cashot. Mientras tanto cu ta luchando cu e preso, e coleganan a bin yud’e y a worde yama coleganan di otro departamento pa yuda pasobra tabata tin un preso cu no a comporta su mes.
A domina e preso y yegando cashot, den un espacio chikito cu tin net prome cu cashot, e persona cu a worde agredi door di dje, tabata bayendo eynan tambe. Ora el a yega eynan, su coleganan tambe a yega eynan y a mira e persona aki tur bao di sanger, nanishi na un banda y e ora ey, pa nan frustracion, nan a baha esaki riba e detenido ey cu ta na e momento ey tabata geboei.
Durante mas of menos casi dos minuut largo, e persona a worde gedal, geskop door di varios di e guardianan di preso. Esey a worde capta riba video y a base di e imagennan di video ey, fiscal a cuminsa un caso penal contra ocho cuidado di preso. e caso ey a tuma luga aña pasa y na final di e caso den prome instancia, hues a dicta seis di e guardianan, cu a haya 2 aña di condena y 2 a worde declara liber.
Ningun hende no a keda contento cu e sentencia, ni fiscal, ni defensa. Fiscal a apela particularmente e sentencia di e dosnan cu a haya vrijspraak, esta worde declara liber y defensa a apela e seisnan cu a haya dos aña di prison incondicionalmente. Dilanti hof, consistiendo di tres hues di Corsou, e caso a worde trata pa tur e hendenan aki. Akinan ministerio publico a cambia un tiki den su exigencianan, unda cu tabata tin exigencianan mas halto den prome instancia, a baha un poco. A exigi pa cinco di e cuidadornan di preso cu ya tabata condena, a exigi 24 luna di prison. Pa un di nan a exigi 30 luna di prison y pa dos di nan, a exigi 12 luna di prison.
| FUENTE: http://www.diario.aw |
