Pa conclui nos entrevista exclusivo cu señor Guillermo Villalobos Sole (MBA), Politologo y, entre otro, Master den Administracion di Empresa, cu trayectoria internacional, ex-asesor di ex-presidente di Panama sr. Martin Torrijos, Matutino DIARIO a puntre como e ta sinti su mes como Costaricense di ta un figura dstaca no solamente den su pais y na Panama, pero tambe na America Latino.Su contesta a sorprende nos pa emotivo, y pa su sinceridad ora el a expresa su sentimento di no ta profeta den su mesun Patria, y tambe door di e forma con el a manifesta su gratitud cu Panama, pais unda e ta residencia actualmente.
“Bon, e ta un sensacion cu tin dos dimension. Un dimension ta cu di berdad mi ta sinti hopi contento y orguyoso cu mi a haya un formacion academico, di balor y principionan, di historia di un pais cu un gran tradicion democratico manera nos pais Costa Rica, y cu mi por a pone na servicio di e mihor interesnan di un nacion ruman manera Panama, cu a habri mi su portanan pa residi den e pais aki manera un profesional mas, aportando mi pipita di santo cu e mayor di e cariñonan cu mi por tin pa e pais aki.
“Pero mi no por laga tambe di sinti un cierto sensacion di frustracion pasobra bo tin biaha ta yega na e conclusion cu bo no ta profeta den bo mesun tera. Hopi di e cosnan cu mi a wordo permiti pa desaroya den e pais aki, tan cercano y bisiña na nos pais, no a bira posible pa mi impulsa nan den mi mes nacion, cual mi ta mira den un situacion cada bez mas lamentable; e democracia costaricense a bin ta debilitando, a bin ta perdiendo bentaha comparativo cu respecto na hopi otro pais di e region, cu no tabata tin un bon desaroyo socio economico ni e tradicion di un democracia.
“ Y ora bo mira un Costa Rica casi inmoviliza, cu problemanan serio di gobernabilidad, y cu un incapacidad di poder logra acuerdonan minimo necesario pa e pais por cana riba e mihor senderonan, ora cada ken ta tuma pa su banda, pues, mi ta sinti un poco di frustracion pasobra mi ta ta haya cu mi lo por tabata haciendo contribucionnan di esaki of otro naturaleza superior den e pais, pero cu lamentablemente mi no a wordo permiti…!”
Profundamente gradici cu Panama:
Villalobos ta sinti su mes profundamente gradici cu Panama, cu ex-presidente Torrijos: “ken mi ta considere mi amigo y mi sa cu e tambe ta considere asina. Mi ta sinti un aprecio special pa su estimable famia, su casa Vivian y nan tres yiu, y mi ta gradicie e confianza cu el a a mustra mi, no solamente atravez di pidi mi pa mi tuma encargo di e Fundacion cu ta hiba e nomber di su tata, y cu e tin mi como Director Ehecutivo, sino pasobra na tur momento durante su gobierno mi a ricibi un respaldo hopi grandi, un contesta positivo, pero tambe mi tin amigonan grandi cu mi por a establece na lo largo di e tempo aki, den e sectornan empresarial, institucional, di ciencia y arte, en fin, un cantidad di hende cu a habri mi portanan, y cu a laga mi sinti manera un Panameño mas”.
Don Guillermo ta sinti su mes tambe hopi gradici pasobra un parti grandi di su realizacion profesional, el a logre na Panama.
“Y mi ta sigur cu lo mi por sigui aporta mi contribucion na e mayor forma posible, cu e cariño di mas halto y e aprecio pa e pais aki. Mi ta pensa cu lo miho cu bo por haya akinan ta su hende, nan calidad humano, nan don di atencion y di anfitrionnan special”, don Guillermo a expresa.
Asina aki don Guillermo ta defini Panama:
“ Panama ta un pueblo alegre, un pueblo cu tin raiznan Caribense, un pueblo feliz cu tin hopi di ofrece na henter mundo, un pais cu a bira Puerto di mundo na unda bo por haya hopi cos, y berdad ta cu mi ta sinti hopi gradici di por duna e miho di mi na e pais aki” señor Guillermo Villalobos Sole, a expresa pa conclui.
Matutino DIARIO ta gradici don Guillermo di a duna nos e entrevista asina interesante aki, y cu apesar di agenda tan preta el a habri nos un espacio cu asina hopi disposicion.
FUENTE: http://www.diario.aw
