E momento cu vuelo 4037 di Conviasa a lanta pa 1:52 pm for di Aruba, esey a nifica tambe cu e frontera di Venezuela cu Aruba a wordo cera oficialmente.Desde Diamars merdia, ningun vuelo pa y for di Venezuela for di tanto Aruba, Bonaire, y Curacao no por wordo realiza mas. Tambe tur permiso pa barconan di fruta for di Estado Falcon a wordo cancela.
Segun NotiFalcón, na Punto Fijo tabata e comandante di Zona Operativa di Defensa Integral, Vladimir Quintero, cu a haci e trabao cu el a ricibi ‘di ariba’.
El a duna orden pa cera tur comunicacion aereo y maritimo cu Aruba, Bonaire y Curacao. Y ta bisto cu esaki ta un decision cu Caracas a tuma, ora cu a bira conoci cu e isla di Curacao lo por bira un centro logistico pa yudanza humanitario di Europa y Merca pa cu Venezuela.
E medida a wordo duna y ta aplicable pa puerto y Aeropuertonan di e region di Estado Falcon, Estado Zulia, y otronan entrante Diamars.
Sinembargo Diamars mainta tabatin e vuelo 4034 di Conviasa cu a yega 9:27 am for di Las Piedras sin ningun problema. Ademas pa 12:25 pm, e vuelo 4036 di Conviasa tambe a ateriza na Aruba. Y esey ta e ultimo vuelo cu a logra yega Aruba.
Pa e dianan venidero, ningun vuelo mas por wordo haci entre Venezuela y islanan ABC. Bo por haci esey si, pero bulando rutanan alternativo, e.o. via Panama City, Bogota, of Republica Dominicana.
Esaki ta di dos biaha cu trafico aereo y maritimo comercial cu islanan ABC ta wordo cera. Na Januari 2018, por corda con President Nicolas Maduro a cera e ruta aki. El a wordo habri bek, te despues di numeroso reunion cu e diferente Gobiernonan.
Tin fuente cu ta mustra cu e medida aki lo ta valido te Diadomingo. Sinembargo DIARIO no a logra haya ningun confirmacion si esey ta berdad.
REACCION DI GOBIERNO:
Ministro di Trafico na Aruba, Chris Romero a emiti un boletin pa 3:30 pm, indicando cu te cu awor na su conocemento, ta e frontera maritimo so ta cera.
Tanto Prome Ministro Evelyn Wever-Croes y Ministro Chris Romero ta monitor e situacion conhuntamente cu Hulanda, y lo duna un reaccion mas aki rato.
FUENTE: Con información de Diario de Aruba
