Tabata Diaranzon mainta pa 9:50 am, cu Central di Polis a dirigi un unidad di Polis di Noord rumbo pa un Highrise Hotel, pa hendenan cu e momento ey ta causando molester den e Hotel.Ora cu Polis a yega na e Hotel, nan a wordo acerca pa e Chief Security, kende a splica agentenan cu nan a mira con dos hoben ta cana cu matanana di Aloë ta molestiando tur e turistanan cu nan topa den nan caminda cu un reptil Boa.
E hobennan aki ta canando rond cu e Boa y ta acerca turistanan pa un que otro.
Polis a hisa cabez y mira con e dos hobennan bon conoci pa Husticia, esta di inicial C. y tambe inicial R., tabata canando bay mas leu direccion panort na Holiday Inn.
Na altura di e Pool Bar di Holiday Inn, autoridad a logra stop e hobennan aki.
Ora cu a controla e hobennan, a bin sali na cla cu esun di inicial R. ta ilegalmente na Aruba! Mesora el a keda deteni, y a wordo transporta pa Warda di Polis. Den su poder a wordo haya un saco di plastico di color conteniendo papel pa lora joint di droga, y tambe algun yerba parecido na marihuana. Den un rol lora di papel di wc, a haya tambe saco transparente cu stekinan di mata di marihuana.
E hoben C. tabatin placa den su poder, pero a laga sa cu e placa aki el a haya di e pareha di su mama, como cu riba Diaranzon e lo ta viahando pa exterior. E suma di placa no ta suficiente grandi pa wordo confisca pa Afpakteam di Husticia.
Ademas, e reptil Boa a wordo kita door di e Chief Security y el a bay cune pa deshaci di dje.
Polis a papia telefonicamente cu e tata, kende a confirma cu enberdad e hoben lo bay viaha e dia ey pa exterior.
Polis a scual e hoben C. masha fuerte mes, y a dune ordo pa e bandona e lugar. E tata tambe a mustra di lo percura cu e hoben lo no pasa mas banda di Hotel of Beach prome cu e viaha pa exterior.
Oficialnan di Warda Nos Costa mientras tanto a cuminza investiga e otro hoben di inicial R., y a sali na cla cu e ta ilegal na Aruba desde luna di Mei 2017. Anto mire awor, ilegal na Aruba ta cana cu droga y molestia turistanan. E hoben ilegal aki no sa con hopi Aruba a traha pa tin turismo riba pia. Increible cu un hende di exterior ta bin daña pa tur cos.
El a keda deteni awor sperando su tempo pa wordo deporta di Aruba. E marihuana ta wordo confisca, y Team Narcotica di Polis ta bay percura pa e wordo destrui.
FUENTE: Diario de Aruba
