viernes, 16 de agosto de 2019

(Aruba) Minister Otmar Oduber ta distancia su mes y su ministerio di acusacionnan cu a wordo publica

Diaranzon mainta, Minister Otmar Oduber, titular di Infrastructura, Medio Ambiente y Desaroyo Teritorial, a un convoca un conferencia di prensa extraordinario, den cual el a informa tocante tres investigacion cu el a instrui e director di Departamento di Infrastructura y Planificacion, pa haci.

Esaki relaciona cu cierto acusacionnan cu tin encuanto ortogamento iregular di tereno, unda e mandatario ta aclarea cu esaki no a tuma lugar bao su maneho awo, sino bao maneho di e minister anterior.

Minister Otmar Oduber a splica cu despues cu siman pasa un denuncia a wordo haci pa un ciudadano di fam Morales, ken a indica cu tin actonan iregular cu su persona lo haya su mes cu otro persona di fam Corona, mesora el a instrui e director di DIP pa haci un investigacion interno, basa riba tal declaracionnan.

E dignatario a indica cu e siman aki a sali publica otro denuncia publico di un persona di fam Rodriguez, contra e mesun persona anteriormente identifica cu e fam Corona.

Pa e mesun motibo aki, Diamars atardi e mandatario a instrui director di DIP pa haci un investigacion mas profundo den e departamento, pero tambe pa entrega un keho formal na Ministerio Publico, pa posible soborno of estafa den cual un of otro di e personanan ya menciona lo por ta envolvi.

Banda di esaki a laga prohibi e entrada di dicho personanan na e edificio di DIP te ora cu e investigacion aki termina.

“Mi kier enfatiza na e comunidad di Aruba, cu ningun di e personanan envolvi den e acusacionnan aki ta traha pa Gobierno di Aruba, pa Ministerio di mi persona, y cu nan no tin ningun vinculo di trabao tampoco cu e personanan aki”, Minister Otmar Oduber a subraya.

“Por lo tanto, mi ministerio ta distancia su mes totalmente di dicho acusacionnan y ta tuma e pasonan necesario pa subraya e integridad di e Departamento di DIP”, Oduber a señala.

E mandatario a referi tambe na un trayecto masha largo cu a tuma DIP hunto cu e director sr. Haime Croes, y a dicidi pa habri pa comunidad di Aruba, varios investigacion cu ta tumando lugar den e departamento, entre otro, nan ta bezig cu dos onderzoek pa loke ta trata e aspecto di gremionan comercial, unda a constata y tin e pruebanan necesario cu hopi negoshi a tuma lugar cu propiedad di pueblo di Aruba.

“Den e caso aki, na momento cu personanan tabata ricibi terenonan propiedad di gobierno den erfpacht hasta den opcion, y for di prome ya caba tabata percura pa bende esakinan pa sumanan miyonario, y caminda cu den varios ocasion a trata di hendenan hopi, hopi cerca di e minister anterior di Infrastructura”, segun Minister Otmar Oduber.

Minister Oduber a subraya cu e manera di procede aki no ta straña nan, pa motibo cu ora di mira un di e acusacionnan cu a bin dilanti den e siman aki, y cu por a mira diamars riba 24ora, ta papiando di un supuesto soborno y of cumpramento di tereno cu ta tumando lugar pafo di Departamento di DIP, cu e minister ta yame “riba caya” pero e procedurenan cu antes tabata normal, bao di e gobierno aki no ta wordo permiti, y sigur e como mandatario no ta tolera pa haci negoshi cu terenonan di comunidad di Aruba.

FUENTE: Con información de Diario de Aruba
 

LO + Leído...