Guardacosta di Caribe Hulandes a rescata seis piscador Venezolano.Tabata Diabierna siman pasa, cu e barco Zr.Ms. Groningen a ehecuta un exitoso operacion di rescate pa yuda e boto cu tabata drief sin rumbo como 60 miya panort di Bonaire.
Tabata e avion Dash-8 di Guardacosta cu den e anochi di Diahuebs pa Diabierna a detecta e boto “Eudismar” ta drief y a nota con e tripulantenan tabata riba dek ta zwaai y pidi auxilio.
E ora e avion di Guardacosta a haci suplica na e tankero Liberty Bay cu e momento ey tabata nabegando den e area, pa asina duna asistencia na e boto.
Rescue and Coordination Center di Guardacosta tambe a manda e barco Zr.Ms. Groningen direccion di e boto aki.
A haci un suplica na e tankero Liberty Bay pa e keda den cercania di e boto te ora cu Guardacosta yega.
Ora cu a yega cerca di e Venezolanonan, a bin haya sa cu nan ta drief como 18 dia caba, despues cu nan a haya problema cu motor den cercania di Trinidad & Tobago ora nan tabata piscando. E tripulantenan a mustra cu nan ta hopi dia caba sin cuminda y awa, y tabatin atencion medico urgente. E tripulantenan a mustra cu e momento ey ya caba nan a cuminza perde speranza di lo wordo rescata. Ta bon mes cu e avion di Guardacosta a bula riba e area y a mira nan.
E barco Groningen a presta prome yudanza medico na e tripulantenan, y a haya cuminda y awa. E militarnan tecnico abordo di e barco Hulandes, a pone un di nan Outboard Motor riba e boto di piscador, y di e forma ey e boto bao guia di e barco a cuminza nabega direccion Bonaire.
Na Bonaire, e tripulantenan a wordo hiba pa Hospital.
E barco Zr.Ms. Groningen ta desde 20 di April 2019 activo den Caribe. E barco bao comando di Kapitein-luitenant ter Zee Nicole Kuipers ta wordo usa pa tarea di Guardacosta, operacion anti-droga, y tambe por duna yudanza humanitario.
E accion aki tabata e prome operacion exitoso despues cu e tripulantenan a cambia completamente dia 6 di September cu a pasa.
FUENTE: Con información de Diario de Aruba
