Tur e Ministronan hunto no por a tuma e decision cu nan mester a tuma, o sea di respalda abiertamente y publicamente e Ministro di Enseñanza, y a permiti pa Juan David, alias Pitipois, converti nan den rehennan di su capricho. Poco biaha mi a yega di mira un actuacion asina debil di parti di cualke Ministro!
Cu kico pitipois ta menaza nan? Cu e ta baha Gobierno? Cu cua acompañantenan? Y si ta asina mes, e contesta categorico mester tabata: dal bay! Baha Gobierno si bo por! Ta unda e y cualke otro mes loco cune ta kere cu nan lo bay? Suicidio politico no ta un cos straño y el a yega di pasa hopi biaha, y den e caso aki mi no ta mira ningun otro posibilidad cu esey si acaso pitipois logra e respaldo di dos mas y dicidi di baha Gobierno pa motibo di su capricho. Figura boso cu el a yega asina leu di insinua, por escrito, e posibilidad di ‘soborno’ di parti di e politico mas integro cu mi a conoce den e ultimo decadanan na Aruba! Y kico su coleganan a haci? Keda mudo! Esey ta un problema cu ta criando raiz den AVP, pasobra e disgusto di su hendenan pa e falta di apoyo di e partido na nan, ta birando cada biaha mas severo. Si ami tabata den e posicion di Artur Dowers mi lo a bise dal bay, y abo mes, bay na maula!
Di otro banda, MEP a caba di pasa den su peor momento desde su fundacion, pero el a sobrevivi, el a keda intacto, cu menos representante den Parlamento, pero depura. Ta manera cu si un man invisible a yude bari y haci mesa limpi. Awor e tin e tempo necesario y mi ta sigur cu e boluntad tambe, di hala mara y prepara e partido pa eleccion. Cu un lider nobo lo bin tambe un rumbo nobo, bon delinea segun e preceptonan di social democracia (goberna pa Pueblo!), y su posibilidad di reconkista poder ta bira real y factible. Su suerte ta cu tin un pitipois cu a bruha tera den e campo contrario di tal forma cu el aumenta e posibilidadnan di MEP considerablemente. Hendenan cu te awor tabata renuente pa bolbe forma parti di e partido geel ta reconsiderando nan posicionnan seriamente y por bolbe integra den un partido den cual nan a milita durante hopi aña. O sea cu e panorama politico por cambia drasticamente.
Pitipois tin e idea di integra su mes den e partido cu pe ta natural, o sea PPA? Informacionnan ta indica cu el a sostene reunionnan caba cu e hendenan oranje, tanto na Aruba como na Corsow. Pero, si e ta pensando riba bira lider e lubida pasobra Benny no ta hala un banda pa ningun hende. Y kico Marisol y Mervin tin pensa di haci? Bay tambe cu PPA? No lubida cu Marisol ta yiu di Domi Tromp, lider di PPA tempo di su tempo, loke ta haci e speculacon ey un tiki mas cu speculacion.
Pero, ta mi opinion cu pe tampoco Benny ta bay hala un banda como lider. Y si esey sosode mes, PPA no ta un match pa MEP o AVP. Mi kier felicita Evelyn for di e columna aki y desee tur cos bon como e lider nobo di MEP. Nel a haci su best, y a logra algun cos importante, incluyendo e saneamento financiero di e partido, pero na caminda el a desvia di e idealnan socialdemocrata di e partido. Awor ta toca Evelyn endereza loke a bay malo, y den esey e por conta cu mi apoyo ki ora cu e tin mester di dje. Tur loke e mester haci ta yama na telefon y mi lo ta dispuesto di contribui cune den tur loke mi por y e ta desea. Mi ta kere den su capacidad di conduccion y mi tin e confianza cu e lo por reconstrui e base di MEP di tal forma cu e por bay cu hopi confianza proximo eleccion, hasta cu e speranza grandi di sali cu un triunfo electoral.
FUENTE: http://www.diario.aw/2011/08/mep-vs-avp-2/
