(Aruba) Valero a dicidi di suspende su operacionnan pa fin di e luna aki

ORANJESTAD(AAN): “Awe cu a drenta e notificacion for di Valero di e suspencion di operacion di e refineria, ta grandemente danki na e impacto di esfuersonan grandi cu a wordo haci cu tin alternativanan riba mesa y cu no a bay over na un ‘shut down’ pero na un suspencion”, asina Prome Minister Mike Eman a bisa durante un conferencia di prensa extra ordinario dialuna mainta.
“Esaki no kier men cu si nos no yega na haya un partner of cumprado den e siman of lunanan nos dilanti, cus nos por haya un situacion mas dificil cu nos tin awe. Ta pa e motibo aki cu esfuersonan di parti di gobierno ta sigui y awe caba Minister de Meza ta biaha pa New Jersey na unda diamars mainta e tin reunion cu ehecutivonan di PetroChina”.

Prome Minister Eman hunto cu su colega Minister de Meza a splica un bes mes di e empeñonan grandi cu a wordo haci di parti di gobierno pa yega na un solucion pa loke ta e situacion di Valero. Awor cu e refineria a dicidi pa nos bay over na un shut down, pero ta tene opcionnan habri den caso di un posibel restart, e empeñonan aki ta continua cu e mesun intensidad cu a wordo haci te awor.

Banda di PetroChina cu a mustra interes renoba pa e refineria, tin tambe Ecopetrol cu diabierna ultimo a informa Gobierno cu den e dianan nos dilanti lo tin mas reunion tumando lugar riba e proposicion cu Valero a entrega na nan. Eman:

“Pa loke ta PDVSA nos ta keda participa e interes di pais Aruba. Tambe na e gobierno di Venezuela nos a informa di e posibilidadnan di acuerdo di cooperacion riba tereno di refineria y energia. PetroBras ta invita pa bin Aruba a base di e reunion cu nos tabatin cu Minister Lobao di Brazil y cu PetroBras mes tambe.

PetroBras algun dia pasa a duna di conoce cu nan sigur kier mira e posibilidadnan cu por tin di intercambio di crudo pa productonan final cu por wordo realisa cu Valero”.

Eman a bisa cu Gobierno lo keda traha energicamente riba e trayectonan menciona. “Cu un esfuerso excepcional cu cua nos a logra tambe e restart di e refineria na 2010. Valero mes tambe ta reconoce e esfuersonan cu gobierno a haci pa aboli e BBO riba exportacion, pa crea e regimen fiscal nobo y pa a haci e settlement agreement.

Esaki ta e motiboann pa cual Gobierno a logra un restart na 2010 cu lamentablemente no a perdura, pero Aruba a haya e oportunidad di 14 luna cu e refineria tabata bek den operacion. A inverti mas di 100 miyon dollar den realisa e operacion aki. Inversion cu a y ta yuda mehora e clima economico di pais Aruba”.

Den oranan di dialuna atardi Minister de Meza a biaha pa New Jersey pa eynan reuni cu ehecutivonan di PetroChina cu tin un interes renoba den Valero.

FUENTE: http://www.diario.aw