Cu PetroChina Aruba lo tin un partner di suma importancia riba tereno di energia

Segun Donny Rasmijn, ta conoci cu PetroChina a haci un oferta na Valero pa cumpra e refineria na Aruba y e negosacionnan ta andando den bon direccion. Pa PetroChina e refineria na Aruba lo ta e prome cu nan lo opera riba nan mes den exterior. Nan tin refinerianan pafor di China pero tur ta den joint-venture cu otro pais.
Esaki ta rekeri hopi atencion y estudionan pa nan por tin e logistica di e refineria bon regla. Actualmente Valero tin acuerdonan cu cierto companianan cu ta abastece y ta entrega tur parts cu nan tin mester pa nan refinerianan. Por ehempel, si un equipo den e refineria na Aruba sufri un daño, den un tempo relativamente cortico, e piesa corecto ta worde manda pa remplasa esun cu a kibra. E logistica aki mester ta completamente domina pa por tin un operacion sigur y responsabel di un refineria.

E importancia pa mantene e refineria habri y operando ta hopi conoci. E refineria ta representa 12% di nos economia, unda cu e ta duna alrededor di 700 cupo di trabao na trahadornan directo di refineria y como 3000 cupo di trabao via contratista. Actualmente e proyectonan cu Gobierno di Aruba ta desplega, ta absorba tur e personanan cu tabata traha cu contratista den e refineria. Pero e proyectonan ta temporario y un reanudacion di operacion di e refineria lo garantisa trabao atrobe pa e personanan aki.

Riba e parti energetico, e presencia di PetroChina na Aruba ta habri caminda pa nos conecta riba e red energetico di Sur America. Un di e motibonan cu e refineria no por competi cu esunnan den Golf di Mexico ta pasobra e refineria di Aruba ta usa fuel oil enbes di gas natural den e boilernan y fornonan. Fuel oil su prijs ta hopi halto en comparacion cu gas natural.

PetroChina tambe lo mester di gas natural pa e refineria y e posibilidad ta grandi cu nan lo bin na un acuerdo cu Venezuela pa instala un liña di gas di Venezuela pa Aruba.

Una bes cu gas natural ta disponibel na Aruba, WEB tambe lo haci uso di e producto pa traha awa y coriente na un manera hopi eficiente. “Y cu Dios su poder, nos haya gas den nos awanan territorial, nos por exporta enbes di importa gas pa Sur America”, Rasmijn ta bisa. E refineria di Aruba ta hopi interesante pa PetroChina pasobra e refineria por “upgrade” e crudo pisa cu lo worde saca for di e Faha di Orinoco y mande pa otro refinerianan di PetroChina cu no por procesa e crudo pisa aki cu ta na abundancia y economico. Pa transportacion di e crudo aki e mester worde mescla, cu por ehempel gasoil, pasobra e ta demasiado pisa. Cu cada bari di gasoil, tres bari di crudo por worde transporta.

Ta factibel pa instala un liña di crudo y uno di gasoil entre e dos paisnan enbes di laga tankeronan nabega bay bin. Esaki ta haci e transportacion di e crudo hopi mas facil, economico, sigur y e gasoil cu ta worde saca back for di e crudo durante di refinacion, lo bay back pa saca mas crudo.

Otro coneccion energetico cu ta hopi importante pa Aruba y Venezuela ta un kabel di coriente. Venezuela ta produci hopi coriente na un manera economico pero nan tin hopi dificultad cu e destrubicion. door di esaki e peninsula di Paraguana ta confronta problema cu coriente.

WEB tin suficiente equipo pa produci y exporta coriente pa Venezuela. Y door di usa gas natural pa e produccion, e ta worde produci na un manera economico pa exporte pa Venezuela. Tambe ora Aruba produci mas coriente por medio di energia alternativo, nos por exporta pa Venezuela. Venezuela, na su turno tambe por exporta coriente pa otro paisnan den Sur America pasobra nan ta interconecta cu otro. “Pues cu binimento di PetroChina pa Aruba nos lo tin un partner di suma importancia riba tereno di energia”, Rasmijn ta termina.

FUENTE: Parlamentario Donny Rasmijn-AVP - http://www.diario.aw