Fly Aruba a laga preguntanan den aire y empleadonan desampara

ORANJESTAD (AAN): Segun Parlamentario independiente drs. Booshi Wever, ultimo lunanan ta hopi den noticia e situacion di algun local, kendenan a bira victima di cierto manipulacion- y promesanan falso di supuesto doño di un compania cu a cuminza un aerolinea “Fly Aruba”, personanan cu a kere den sinceridad di e “cabayero” aki, te cu algun a hasta retira for di un trabao fiho, pa drenta den servicio di Fly Aruba.
Asina tambe varios Arubiano, trahando den exterior, a laga nan famia atras pa nan por a cuminza un futuro nobo na cas mes; awor pa motibo di promesanan falso, trabao ni na Aruba, ni den exterior!

Mi ta den e proceso di haci e minister concerni algun pregunta al respecto, pero mientras tanto e personanan retirá no ta weita ningun interes di parti di e gobierno aki, mucho menos di Otmar.

Otmar ta sigui broma cu turismo ta hopi bon, pero unda e por tabata e speranza pa e “empleadonan” di Fly Aruba, e ta faya barbaramente. Asina leu cu mi por a averigua, ningun esfuerzo di su banda pa e personal haya un claridad den e situacion. Personanan cu gastonan diario cu mester worde cubrí di algun manera, y aki aya hasta un hypotheek cu mester worde pagá, si e persona no kier weita su cas bay na vindishi.

Pa colmo tin indicacion cu e doño a bandona Aruba, of ta den proceso pa bandona nos isla, sin cu Otmar of su gobierno ta haci ni e minimo esfuerzo pa para e persona ey, y exigie responsabilisa su mes pa su hechonan. Un di e supuesto hechonan ey ta cu aparentemente e kier bay hunga e wega di manda e negoshi failliet, cu e unico proposito di no mester paga e trahadornan.

Esaki ta e amigonan di e Otmar ey, kende pues ta scohe pa laga nos propio yiunan di tera na caya!
Te hasta Otmar Oduber a laga sa cu e no por haci nada pa e trahadornan aki, yiunan di tera. Otmar Oduber a bay hasta asina leu di bisa e yiunan di tera aki, victimanan di e “farsante” aki, cu ta nan a tuma e riesgo pa gamble di bay traha den e ramo aki.

E yiunan di tera aki ta convencí cu Otmar Oduber lo por a haci algo pa nan, sigur mirando e hecho cu e tin un hopi bon amistad cu e doño y su yiu. Of yiust esey ta pone cu Otmar no kier haci algo pa nos yiunan di tera?

Mescos cu Otmar a broma cu ta E y su gobierno a trece e gigantenan KLM y American Airlines back, mescos e mester por tin e poder pa pone e enano Fly Aruba cumpli cu su empleadonan, y por cierto cu Aruba mes tambe! Sino, Fly Aruba a resulta di ta otro Fly by Night, unda e supuesto record di e doño aparentemente lo tabata conocí, y na prome lugar cerca Otmar!

Finalmente toch lo ta mi deseo cu Otmar lo por bin cu un noticia alentador pa e empleadonan, algo realistico y factibel, pero nunca mas un promesa cu e sa cu e lo no por cumpli.

FUENTE: http://www.diario.aw