Un cos cu nos mester saca afo ta cu Hulanda mester a mira cosnan hopi serio den e prespuesto pa el a tuma un actitud di rechazo asina fuerte. Mi no por haya ningun otro splicacion pa un negacion asina grandi y persistente. Tur e impresion cu a worde crea pa Mike y su entorno tocante nos relacionnan cu Hulanda a resulta un simple blas cu a perde su aire y ta colga den laira manera un figura di plastic sin substancia. Ta cuanto tempo y esfuerzo ta bay tumanos pa coregi e situacion y bolbe na un relacion normal, sin sospecha y sin malicia, cu Hulanda? Den ki sentido e impase aki a faborecenos? E supuesto welga di hamber a yuda na algo? Tur e proclamacionnan tocante nos autonomia tabata tin algun proposito real, of nan tabata simple gritonan emocional pa purba influencia un parti di nos Pueblo pa lo ke por a resulta den un ganashi politico superficial? Nos mester stop di haci nos mes ridiculo cu imitacionnan barata di lo ke nos ta tende y mira den e paisnan pazuid di nos. Esaki ta Aruba, no Sur America! Nos ta un isla Hulandes den nos composicion politico, no un parti infinitamente chikito di e gran continente Americano cu ta rek di Venezuela te mas aya di Patagonia.
Na momento cu mas nos tin mester di lidernan sensato, bon para den nan zapatonan, cu conocimento nan profundo di loke ta un politica exterior compleho, cu tin e capacidad di pone un banda e formulanan engañoso di populismo y asumi deliberacionnan cu por resulta den logronan concreto, kico nos ta haya? Un set di pseudo-lider cu egonan mas grandi cu nan cerebronan. Con por ta cu Mike no a mira o supone sikiera cu henter e badabada aki ta bay rebenta na momento cu el a dicidi di nombra un Ministro totalmente mediocre pa dirigi e finanzanan di nos isla? Ta evidente cu e no a siña absolutamente nada di su experiencianan doloroso cu su actual Ministro di Husticia, pasobra el a ripiti e hazaña di nombra un duplicado na lugar di deshaci su mes di tur dos.
Y pa corona e obra, atanos cu un “Angel” treci for di Corsow pa endereza henter e situacion y purba con vence Gobernador pa firma e presupuesto. Personalmente mi no ta kere den milagrero, ni hendenan cu por haci magia. Nos tin un problema cu mester di solucion, y nos tur sa cu Angel no ta bay hacie via un arte di magia. El a bin contrata pa haci un tarea specifico, o sea endereza loke e por di e finanzanan publico, y djey impone e medidanan cu ta planifica caba. No ta bay tin ningun cambio den esey, pasobra e insistencia ta pa tuma medidanan impopular pa trata di produci e fondonan necesario pa cubri cualke discrepancia cu ta existi.
Entre e medidanan ey, Angel mester bay reduci e aparato gubernamental, o sea lo ke nos conoce como burocracia. Ta dificil pronostica cua obstaculonan e ta bay topa, y cu a resistencianan e ta bay haya di entre otro e sindicatonan. E ta bay ta un di e tareanan specifico cu e mester ehecuta bao guia di e Gobierno cu a manda buske. Mi no tin duda den su capacidad o conocimentonan, unda mi duda ta cuminza ta cu e implantacion di medidanan impopular, cu no ta importa ken bin cu nan, lo tin obstaculonan grandi pa vence. Di tur manera e confusion tey, y e ta creciendo cada biaha mas, ya cu Gobierno no ta dunando indicionan di claridad riba e asunto.
| FUENTE: http://www.diario.aw |
