(Aruba) Turistanan Venezolano ta sinti nan mes ripped off cu huurmento di apartamento

Un grupo di turista Venezolano cu a book online ta sinti cu nan a ripped off nan. E turistanan aki a book online pa bin keda na Wayaca na un Airport Suites. Pa sorpresa a resulta cu nan a wordo hiba te den un cas na San Nicolas.
Un cas cu no ta apto pa huur ni na local corda turista.

Mas cu un famia diferente cu ta turista di Venezuela a huur e cas na nan. Un solo baño sin porta pa comparti entre e huespednan den e cas.

Tin cu a paga casi 400 dollar pa un siman di estadia pa un camber y otro casi 600 dollar pa un siman.

Den entrevista cu Jose Gregorio Perez el a conta su experiencia cu no ta loke el a spera for di un isla turistico. Ta ora cu el a yega aeropuerto el a paga y a wordo notifica cu e lo wordo hiba otro localidad pasobra esun di Wayaca Suites ta yen.

Ora cu nan a yega mesora a wordo bon ricibi pero no a spera cu nan lugar di keda lo ta esaki. A priminti airco, wifi etc pero na final tabata tin falta di airco y wifi. Ademas ta un fan a wordo poni pa nan.

Jose Gregorio Perez a splica cu tabata tin un otro Venezolano cu tambe a bin keda y a paga 100 dollar pero a keda drumi den sofa den sala. Esun aki mientrastanto a bandona Aruba caba. E persona di contacto ta Mireille St Jago y ta via email e contactonan ta wordo haci. Loke a hala atencion ta cu e persona aki ta un politico activo cu ta huur e localidadnan aki.

Den cada conferencia por scucha ultimo dianan aki e miembronan di MEP ta cuestiona e calidad di turista cu ta bin keda den apartamentonan y cu ta cana rond cu maleta ta coy bus. Awor a resulta cu nan mes tin candidato riba lista ta biba di e entrada di e tipo di turista aki y bay te aeropuerto personalmente pa busca nan.

Un otro persona cu tambe a keda den e cas aki ta Jose Chacon. E ta un di e turistanan Venezolano cu tambe a yega Aruba. El a bin cu su partner habri aña. Nan tambe a huur un localidad pa keda pero nunca a pensa cu nan lo bin termina den un cas asina malo y sin fan te hasta.

Nan a paga manera cu nan a yega aeropuerto 380 dollar. Un suma cu nan lo no por haya bek. Jose Chacon mes ta comenta cu e privacidad no tey. Banjo sin porta etc. Nan mester sali pa duna privacidad na otronan den e cas. Cushina tabata yen di pupu di raton y nan mester a laba tur cos pa asina por a usa esaki.

E bentanan di e cas ta cay, portanan claba cu plywood y asina tin mas cos cu imposibel por cobra un suma asina grandi. Kizas instancianan mester atende cu e tipo di negoshinan aki cu ta duna nos isla un imagen negativo.

FUENTE: http://www.diario.aw