Durante e prome mitar di 2014 British Gas y e compania frances Total a sera un alianza cu REPSOL pa sigui profundisa e investigacionan cu REPSOL a inicia na 2013. Minister de Meza ta splica cu despues di e prome fase, cu a encera investigacion sismico 2D.
Despues di esaki a tuma luga e di dos fase, cual ta pa un investigacion sismico 3D cu a conclui na juli 2014. E datonan cu a ricibi ta actualmente den e fase di procesamento na e laboratorionan na Madrid y Londres y ta spera di completa esaki pa fin di mei di e aña 2015.
Na e momentonan aki ta tumando lugar e interpretacion y analisis di e datonan pa asina yega na un decision si lo bay perfora, como tambe unda lo haci e prome perforacionan. E mandatario a splica cu den edit res cuartal di 2015 e tres companianan aki lo dicidi si nan lo sigui cu performacion.
“E fase di performacion ta uno hopi mas costoso si bo compare cu otro fasenan cu ya a tuma lugar; e ta un compromiso mas serio”, Minister de Meza a expresa. “Investigacionan por duna un indicacion hopi exacto riba presencia di gas of petroleo bou di fondo di lama, pero ta ora cu haci e perforacion bo ta haya sa en berdad si tin gas, crudo of condensado, ki cantidad y na ki profundidad”. E informacion aki lo determina tambe si ta conviniente of no pa sigui perfora.
“E proceso di extrae eventual gas of petroleo ta uno largo y costoso.
Cualkier un di e mineralnan cu lo worde haya ta sumamente beneficioso pa Aruba”, Minister de Meza a bisa, añadiendo cu segun expertonan e probabilidad pa gas ta mas halto, pero ta te ora cu bora lo haya sa kico en realidad ta e situacion y si ta cumbini pa sigui cu e proceso di saca e producto.
| FUENTE: http://www.diario.aw |
