Partidonan di oposicion na Suriname a laga sa despues di su detencion na 2013 y su extradicion pa Merca cu su tata president Desi Bouterse pa motibonan moral mester renuncia. “Mi ta keda para ariba cu e president mester tene honor na su mes y renuncia. Pasobra ta trata un yiu di dje cu tabata ocupa un puesto oficial y ademas ta atende cu documentonan oficial.”
Segun Gajadien, Dino Bouterse a demas a haci entrega di paspoortnan diplomatico oficial na stranheronan.
Na Merca e huez Shira Sheindlin no a bay di acuerdo cu tur exigencia di fiscal. El a bisa cu no tin prueba cu e armanan cu Dino Bouterse lo a entrega na Hezbollah lo a wordo usa pa comete atentadonan contra Merca.
Lider di fraccion di NDP Ricardo Panka no ta mira ningun conexion entre sentencia di Dino Bouterse y trabao di fraccion di e partido. ” E fraccion no tin nada di haci cu esaki. El a wordo sentencia y nos a wordo poni na altura di esey.” Panka ta spera si cu oposicion lo usa e sentencia como parti di nan campaña na caminda pa eleccion. Abogado Irvin Kanhai no kier haci ningun expresion politico encuanto eventual consecuencia politico pa e president. “Mi ta solamente su abogado den algun caso. mi no ta consehero politico di e president”, segun e hurista.
Den su ultimo palabranan prome cu e sentencia Dino Bouterse a pidi e huez pa tene cuenta cu su “11 yiunan precioso cu awor ta sin nan tata”. El a expresa duele pa locual el a haci y a laga sa cu e lo usa su tempo den prison pa studia agricultura pa despues cu e sali di prison e por percura pa mantene su yiunan.
Dino Bouterse diamars a wordo sentencia na 16 aña y 3 luna di prison na New York. E tabata acusa di contrabando di cocaina, di kier a facilita e movimento di terror Hezbollah cu un base na suriname y traficacion den armanan ilegal via su oficina den e Unidad Anti-terorista di Suriname CTU.
Esaki a Sali na cla despues cu autoridadnan a scucha grabacionnan di combersacionnan entre Bouterse y infiltrantenan di Drug Enforcement Agency (DEA) di Merca.
E acusacion contra Bouterse ta mustra cu riba prome di Februari 2013 dos infiltrante di DEA a bay bishita Bouterse na Suriname.
Nan a lage kere cu nan tabata traficantenan Mexicano di droga.
Den nan combersacion cu otro, Bouterse a laga nan sa cu e por facilita nan cu traficacion di droga y compra di arma.
Riba 28 di Juni 2013 un biaha mas nan ta bishita Bouterse na su oficina, unda cu nan a papia over di traficacion di 450 kilo di cocaina pa Merca.
Dino te hasta ta saca un pakete di cocaina for di e kluis den su oficina y su partner Quincy M. a bisa nan cu e droga a wordo prepara cu cierto quimiconan, door di cual e cachonan na aeropuerto lo no por hole e droga.
Bouterse tambe a saca un lanzador di cohete for di e kluis y ta duna e agentenan di DEA esaki.
Na Juli el a papia cu nan atrobe algun biaha tocante e base di Hezbollah cu e lo kier bin cune na Suriname.
Fin di Juli el a biaha pa Grecia pa traha plannan concreto cu su contactonan.
E supuesto hefe di Hezbollah ta bisa Bouterse cu su organizacion ta bringa contra e Mericanonan.
“Bo a bay di acuerdo pa ricibi nos mucha hombernan, pa asina nan por train pa nan por keda pa ehecuta operacionnan despues”.
“Bo ta bay di acuerdo”, e infiltrante ta puntra y Bouterse ta bisa si.
E agente undercover ta puntra Bouterse tambe si e por provee armanan special manera cohetenan anti-avion, granadanan special y explosivonan y Bouterse a bisa cu e tin mester di 2 luna.
A base di e accion di infiltracion aki, Bouterse a wordo deteni na Panama na Augustus 2013, riba peticion di autoridadnan Mericano.
Un castigo di bida largo tabata colga riba su cabez y pesey Bouterse a dicidi di admiti parcialmente, a cambio di un descuento di castigo.
FUENTE: http://www.diario.aw |