Un informacion cu a circula rond mundo, y tambe hala hopi atencion di expertonan di beyeza, ta e resultado e siman aki di certamen di Miss Venezuela.E ganadora a resulta Thalia Olvino di Delta Amacuro, y e ta bay representa e pais na Miss Universe.
Pero e unico midimento cu hendenan sa di Thalia Olvino, ta su estatura, esta cu e ta 1.78 meter. E resto di midinan? Pues si acaso e ta 90-60-90, esey no a bira importante mas pa Miss Venezuela.
E hoben di 19 aña di edad, studiante di Marketing, a wordo corona durante un certamen hopi simple, y pa prome biaha den historia no a menciona e taya di e candidatanan, den un intento pa celebra “un beyeza real”.
Ningun rato a menciona e taya di e candidatanan, pero si tabatin desfile den trahe di baño. Envez cu e MC a menciona e midi di cada candidata, tabata usa palabranan pa defini nan, esta “centrada”, “segura”, “espontanea”, “responsable”, “amorosa”, “independiente”.
E organizadornan a admiti cu nan tabatin limitacion di recurso pa crea e show, awor cu e pais ta pasando den e peor crisis den su historia recien, cu hiperinflacion y un economia cu a cay te na mitar.
Varios reina di beyeza grandi a manda mensahe di solidaridad pa e Missnan aki den tempo di crisis. Pero hopi reaccion for di rond mundo riba Diabierna via social media, a comenta ta “con flaco” candidatanan tabata na e certamen. Indicando asina con dificil ta na Venezuela pa haya cuminda.
FUENTE: Con información de Diario de Aruba
