lunes, 7 de octubre de 2019

Casonan penal Bo Aruba y Refineria lo bira historico

“Gobierno Mike Eman no por scapa di e investigacion cu Algemene Rekenkamer Aruba a haci riba e proyecto di Bo Aruba. Investigacionnan haci dor di Algemene Rekenkamer Aruba ta parti di e sistema di control severo riba gobernacion di Aruba. Ministerio Publico no por pone e rapport un banda pasobra ta acusacion serio, independiente, di e Tribunal di Cuenta di Aruba, cu Ministerio Publico mester tene na cuenta ora e ta atende accionnan contra ley riba tereno administrativo di e pais.”

Parti di e placa cu Arubianonan mester paga como medida, ta pa cubri e proyectonan di PPS, conoci como proyectonan di Bo Aruba.

Informantenan a splica DIARIO cu por nota cu politiconan cu ta sostene gobierno anterior di Mike Eman ta crea e impresion cu e acusacionnan di “Bo Aruba” ta basa riba wega politico.

Sinembargo e acusacionnan a nace den investigacion independiente y imparcial cu Algemene Rekenkamer Aruba a haci riba e suma enorme cu di 1.6 Biyon cu e gobierno di Mike Eman a uza como fuente pa un cantidad record di proyecto, cu nan no a vigila.

E mayoria di AVP den Parlamento tambe a wordo acusa den e mes rapport di Algemene Rekenkamer Aruba, di no a practica e control cu nan mester a practica den e proyecto mayor, cu lo a cuminsa cu 20 proyecto basico, pero continuamente mester a wordo amplia pasobra tabata trata di proyectonan “dinamico”.

Ta papia di proyecto basico, pasobra for di e 20 proyectonan a nace mas cu 200 proyecto den cual gobierno a participa hunto cu empresarionan priva.
No tabata tin ningun control riba placa di pueblo. Segun e rapport di Algemene Rekenkamer Aruba e proyecto tabata contra reglanan cu ta exigi pa gobierno y Parlamento por sigui desaroyo di un proyecto den cual placa di e pueblo ta envolvi.

Mientras den pueblo e pensamento ta wordo crea cu ta politica ta sconde tras di e acusacion na Ministerio Publico, cu cualkier momento lo por actua, berdad ta cu e rapport ta e prueba oficial cu Ministerio Publico mester pa actua contra gobernantenan di gobierno Mike Eman pa a hinca Aruba den e proyectonan incontrolabel pa e pais.

“Ta un suma di 1.6 Biyon a pone pa e proyectonan aki cu no tabata atende cu necesidad basico di Aruba,” informantenan a mustra.

E otro caso cu lo bira un pagara pa gobierno Mike Eman ta bira e proyecto di Refineria di Aruba. Den e caso aki instancia manera Raad van Advies a cuestiona e circulacion di placa entre entidadnan nobo cu a wordo introduci.

“Aki no ta trata di pueblo paga debe nacional so. Aruba mester paga pa placa cu a wordo gasta sin control of limite dor di gobierno Mike Eman cu mester splica Husticia kico a sosode. Pueblo directamente ta paga belasting riba e proyectonan PPS y placanan cu a wordo gasta den cuadro di e proyecto refineria,” a wordo treci dilanti.

DIARIO ta presenta awe un prueba di e rapport di Algemene Rekenkamer Aruba riba e forma cu a gasta placa di Aruba cu awe ta paga belasting pa cubri e gastonan cu awe pueblo tin cu e proyectonan aki.

Riba e lista por mira con pa bin cu Tram y supuesto renobacion di Oranjestad a cumpra propiedad y a gasta placa na forma barbaro. Pues no tabata solamente compra di un tram por ehempel.

E Tribunal di Pueblo a duna prueba cu no tabata tin forma pa realmente controla e gastonan. Esaki ta prueba oficial pa Corte di Husticia!


FUENTE: Con información de Diario de Aruba
 

LO + Leído...