E contacto sospechoso riba pantaya, tabata nabegando e momento ey direccion di Aruba. E trace di e boto ta mustra cu el a bin for di Venezuela y ta rumbo pa Aruba.
Basa riba esaki, mesora e funcionarionan di Rescue and Coordination Center di Guardacosta, y e punto di sosten di Guardacosta na Aruba a tuma accion.
Un boto tipo Metal Shark hunto cu miembronan di Guardacosta y Arumil (milicia di Aruba) a subi abordo y a bay direccion di e boto sospechoso cu ya ta den awa teritorial di Aruba.
Na momento cu a intercepta esaki, Guardacosta a bin haya a haya un boto Venezolano den condicion hopi malo, y abordo 14 hende ilegal. E lancha tabatin 2 Outboard Motor cu casi no ta ni funciona drechi. Algun hende abordo so tabatin un Jacket di Salbabida bisti. Otronan ta djis bisti cu sweater.
Ademas di hende, e boto tabatin algun animal tambe abordo. Segun Guardacosta, e grupo di hende ilegal tabatin animalnan di especie indigena hunto cu nan.
Nan a haya un gai di pelea, 19 papagayo, y tambe un pakete conteniendo un substancia cu ta parce di ta un tipo di steroid. E animalnan tabata poni den haula traha djis cu un baki di plastico, riba cual ta pone waya di cura di galiña wanta cu cabuya y tie-wrap.
Algun persona for di e boto a wordo hisa den e Metal Shark, y algun funcionario di Guardacosta a bay riba e lancha pa asina trece nan rumbo pa Aruba.
Unavez cu a yega Aruba, tur Venezolano indocumenta cu a purba di drenta Aruba a wordo traspasa pa Warda Nos Costa y Cuerpo Policial di Aruba. Servicionan Veterinario a tuma e bestianan indigena. Tambe Dienst Volksgezondheid DVG tabata presente pa test e personanan indocumenta.
Segun Guardacosta a splica, e uso di un boto asina den mal condicion, a demostra un biaha mas ta ki tipo di riesgo e personanan aki ta tuma pa por yega na e islanan ABC. Pa colmo e dianan aki casi no tin gasolin mas na estado Falcon ni na estado Zulia, pues ta logra cremencha pa haya tiki combustible pa por subi lama y haci e ‘transporte’.
Guardacosta pesey ta avisa hendenan pa no tuma e tipo di tripnan aki. Ta un hecho cu e tipo di botonan cu ta wordo usa pa tranporta hende no ta den bon estado pa subi lama y cu e personanan cu ta nabega cu nan ta tuma un riesgo enorme.
No obstante esaki, Guardacosta ta sigui cu nan patruyahe intensivo pa cuida y vigila e awa maritimonan di Aruba, Curaçao y Bonaire. Patruya di Guardacosta ta ricibi asistencia for di Defensa den forma di e barco station Zr.Ms. Groningen.
Kustwacht tambe ta pidi ayudo di tur ciudadano cu ta detecta cualkier movimento sospechoso riba lama of na costa, si acaso ta detecta algo por yama 913. Cu ayudo di ciudadano nos por mantene e seguridad di e lama y costa di e islanan.
FUENTE: Agencias
