Cu yegada di e temporada di horcan, un reto nobo ta bati na porta di paisnan den region di Caribe y Latino America. E desaroyonan mas severo na Venezuela a tuma luga despues di e temporada di horcan 2018.E ansha pa bandona Venezuela a aumenta na final di 2018 cu e menasa cu Venezuela lo por a bira un base militar di Rusia mientras e situacion economico di e pais a empeora.
Region di Caribe, incluyendo Aruba a wordo inunda pa entrada ilegal di personanan cu kier a huy e realidad di Venezuela. Reglanan internacional a drenta na vigor pa e trato diferente cu e refugiado Venezolano mester ricibi compara cu otro migrantenan ilegal.
E problema no ta unico pa Aruba pasobra tur pais cu na e momento aki conoce presencia di refugiadonan, mester bay adapta nan cifranan a necesidad cu lo bati na porta en caso di cualkier calamidad of hasta condicion di tempo inespera.
Unabes cu a admiti e refugiado na Aruba, mester percura pa su bienestar y e mester ta parti di tur plan cu ta wordo traha pa acomodacion special por ehempel den caso cu alarma pa cualkier condicion peligroso di tempo, wordo bati dor di autoridad.
Mescos cu tur pais den su region, Aruba lo mester tin un plan pa acomodacion sigur di refugiadonan tambe mescos cu garantia cu nan lo haya asistencia cu cuminda y tur loke nan lo tin mester pa sobrevivi condicion di tempo.
Informantenan a mustra cu e temporada di horcan ta un reto grandi pa e region. E mayoria di refugiado cu a busca salida di Venezuela for di 2018, tin un problema pa acomoda su mes na hopi pais debi na e cantidad di refugiado cu na cierto paisnan ta biba na aire liber.
Den Caribe, Aruba ta uno di e poco islanan cu un riesgo grandi den temporada di horcan aunke nunca por dicidi kico un horcan of cualkier otro sistema tropical ta haci. Pues e pais semper mester ta prepara di acuerdo cu reglanan pa siguridad di e poblacion.
Por yega e momento, cu pa siguridad personal di ciudadanonan mester evacua un bario caminda tin un peliger mas grandi pa condicion di tempo. No necesariamente mester papia di horcan, ya cu ta conoci cu un dia di yobida pisa continuo, ya por causa problema serio. E nivel di lama tambe por subi debi na condicionnan cu no mester di presencia directo di un horcan of tormenta pa presenta.
“Rabo di horcan” ta un fenomeno cu sigur Aruba ta tene na consideracion debi na e forma cu horcannan ta alimenta nan mes cu mal tempo presente riba continente Venezolano y e forma cu un ola tropical por activa e zona di convergencia intertropical riba Aruba.
Aruba mester ta prepara pa cualkier alarma cu tin barco ilegal riba lama di Aruba den condicionnan di tempo peligroso. Autoridad di Aruba mester keda pendiente di presencia di personanan, desconoci pa autoridad, na Aruba pero cu den un caso di emergencia mester haya asistencia.
Segun informacion, den e plan total pa atende cu calamidad, mester tene cuenta cu exigencianan mas importante cu por presenta den maneho di refugiadonan durante temporada di horcan.
FUENTE: Diario de Aruba
